حوار صريح مع مخلصنا المسيح

فى لحظات من التوهة واليأس...................
فى لحظات معاناة من مرارة النفس............
فى لحظات من التذمر على احوالى اليوم والامس.......
وقفت انادى ربى والهى
اعاتبه واشكيله مر احوالى
متذمرة ...... شاكية.......باكية
متوجعة من كثرة الامى وجراحاتى
لاقيتنى باكلمه..................
والمفاجأة انه رد عليا
وكان الحوار التالى:
الابن:
لما تحب بجد من قلبك وحبيبك يتخلى عنك ........ ده ميجرحش ؟؟!
الرب يسوع:
طيب ما انا حبيتك وبذلت ذاتى عنك وانت كل يوم بتتخلى عنى بخطيتك .......... ده ميجرحش ؟؟!

الابن:
لما اقرب الناس ليك يتخلى عنك ....... ده ميجرحش؟؟!
الرب يسوع:
طيب ما انت اعز مخلوق عندى ودايما بناديلك تجينى وتقرب منى وانت دايما مش سامعنى ........ ده ميجرحش ؟؟!
الابن:
لما تسمع كلام الناس وتلاقيها بتتكلم وحش عنك ...... ده ميجرحش ؟؟!
الرب يسوع:
طيب يا ابنى ما انت دايما بتتكلم وحش على اخواتك اللى المفروض كلكم اعضاء فى جسدى الواحد ........ ده ميجرحش ؟؟!
الابن:
لما اقرب الناس لقلبك يصدق كلام الناس .......... ده ميجرحش ؟؟ّ
الرب يسوع:
لما المحبة اللى وصيتكم تعاملوا بعض بيها تروح من قلوبكم وتعادوا كل واحد مع قريبه ....... ده ميجرحش ؟؟!
الابن:
لما تتعب لغاية ما شغلك يكبر وييجى غلط موظف يهد كل اللى بنيته ........ ده ميجرحش ؟؟!
الرب يسوع:
طيب ما انا تعبت جدا علشانك اتصلبت واتعذبت بدالك علشان اوهبلك الملكوت وانت بكل بساطة بتيجى تضييع ابديتك بلذاتك وشهواتك واهوائك .......ده ميجرحش ؟؟!
الابن:
لما تتخيل ان امنيتك اتحققت وفى ثانية يضيع الامل ........ ده ميجرحش ؟؟!
الرب يسوع:
طيب ما انا دايما باسندك وعلى ضعفاتك باقويك وبتوبتك بتبقى خلاص جايللى وانا مستنيك وفى لحظة الشيطان يغيرك ومن تانى لشرورك يرجعك ويتهد كل اللى بانيه .........ده ميجرحش ؟؟! الابن:
لما تكتشف ان اقرب الناس ليك هوه اكتر واحد مش فاهمك........... ده ميجرحش ؟؟!
الرب يسوع:
طيب يا ابنى ما انا دايما بابعتلك رسل وكهنة ووعاظ يفهموك قصدى من محبتك ويعرفوك حلاوة الحياة معايا ومع ذلك مش بتفهم الرسالة ولا بتنفذ الوصية ....... ده ميجرحش ؟؟!
الابن:
لما تقبل على نفسك الخيانة ومتقبلهاش على غيرك ......... ده ميجرحش ؟؟!
الرب يسوع :
زمان يا ابنى يهوذا تلميذى خانى وكتير منكم دلوقتى بيكرر الخيانة دى ........ ده ميجرحش؟؟!
الابن:
لما اعز صديق ليك يتخلى عنك ......... ده ميجرحش ؟؟!
الرب يسوع:
عملها زمان بطرس انكرنى واتخلى عنى رغم وعده ليا انه عمره ما هيسبنى وبيعملها كتير دلوقتى من ولادى اللى بيسيبوا الايمان المسيحى ويجروا ورا اوهام بيصورهالهم عدو الخير ...... ده ميجرحش ؟؟!
الابن:
لما تحس انك ملكش لزمة فى الحياة ........ ده ميجرحش؟؟!
الرب يسوع:
اوعى اسمعك تقول كدة تانى اوعى تيأس من مراحمى هو يعنى انا لما باسمع صراخك واهاتك ...... ده ميجرحش؟؟!
الابن:
لما تحس فى لحظة انك ملكت الدنيا وما فيها وفى الاخر تلاقى كل حاجه اتهدت ....... ده ميجرحش؟؟!
لما تعمل اللى عليك وفى الاخر مفيش فايده ........... ده ميجرحش ؟؟!
لما تتعب وتذاكر وتنجح وفى الاخر شهاده محطوطة على الحيطة ......... ده ميجرحش ؟؟!
الرب يسوع:
ان مأخدتش اجرك فى الدنيا متخافش لك عندى ميراث كبير فى الابدية بس انت اعمل اللى عليك وسيب الباقى عليا....
الابن:
لما دموعك وجراحك تهون على كل القريبين منك .......... ده ميجرحش؟؟!
لما تخسر اقرب الناس ليك لحاجه انتا مش ليك زنب فيها ........ ده ميجرحش؟؟!
الرب يسوع:
لو هنت على كل ناسك وحبايبك وقرايبك عمرك يا ابنى ما تهون عليا دا انت منقوش فى كفى وشايلك جوا قلبى واللى يمسك مس حدقة عنيا
دموعك يا ابنى دى غالية جدا عليا
هامسحالك واريح بالك واضمدلك جراحك
وطول ما انا موجود متعولش الهم لانى انا راعيك
ومش هاعوزك لشىء
تعالوا الى يا جميع المتعبين والثقيلى الاحمال وانا اريحكم
سلامى اترك لكم سلامى انا اعطيكم
ثقوا انا قد غلبت العالم
الابن:
اااااااااااااااااااااااااااااااااااااااااااه
حبيبى ربى والهى ومخلصى يسوع المسيح
اسف جدا جدا على ضعف ايمانى
انا هاجيلك واترمى بين احضانك وتحت اقدامك
وعند صليبك
شايف جراحك والامك شايف دمك الغالى الثمين
اللى دفعته مهر عشانى
هانت كل الامى
هانت كل جراحى
قدام جراحك العظيمة
قدام طعناتك
قدام غفرانك لخطاياى باستمرار
خلاص يا ربى اتعلمت الدرس كويس
بس ساعدنى يا ربى اغفر واسامح
ساعدنى وادينى القوة اتغلب على الامى
واواصل حياتى بكل ما فيها
بحلوها وبمرها
لحد ما اجيلك
وتسكنى فى ملكوتك
الى هنا انتهى الحوار